ციხის რეფორმა შენელებულად მიმდინარეობს

ირმა კახურაშვილი

რა ელის პატიმრობიდან ახლახან გათავისუფლებულ ადამიანს? უნდა ჰქონდეს თუ არა მას საკუთარი თავის და ოჯახის შენახვის შესაძლებლობა? როგორ უნდა მოეხმაროს სამთავრობო და არასამთავრობო სექტორი, რომ სოციუმში დაბრუნდეს? ამ ყველაფერში გადამწყვეტად მნიშვნელოვანია პენიტენციური დაწესებულებებიდან მსჯავრდებულთა გათავისუფლებისათვის მომზადების პროცესი, როგორც „გარდამავალი მენეჯმენტის“ შემადგენელი ნაწილი. თუ რა მდგომარეობა გვაქვს ამ მხრივ, უფრო თვალსაჩინო გახადა კვლევამ, რომელიც ევროკავშირის დაფინანსებით, პროექტის „გაუმჯობესებული შესაძლებლობები: პატიმრების, ყოფილი პატიმრების და პრობაციონერების ფსიქო-სოციალური რეაბილიტაციისა და რესოციალიზაციისათვის“ ფარგლებში, საინფორმაციო სამედიცინო-ფსიქოლოგიური ცენტრ „თანადგომას“, „ინიციატივა მოწყვლადი ჯგუფების რეაბილიტაციისათვის“ და ჰოლანდიური ორგანიზაცია „მეინლაინ ფაუნდეიშენის“ ძალისხმევით განხორციელდა.